عاجبني نور الفؤاد
الضوى لي طرق الرشاد
بالله ياخالق العباد
تم المنى ثم المراد
في نظمي في شافع التناد
ما يجف لي أبدا مداد
قلبي البحبو وليهو راد
زده حب وأملاه وداد
يبقالي شيكا ذو إعتماد
أصرفو في يوم الميعاد
ثنيت بي كامل الصفات
الدونه ما بتنفع حياة
لمانا من فرقة وشتات
وربطنا بأوثق صلات
وضوع أبو قدرا سما
جاتو الحسان من السما
آمنة المخاض ما ألما
يا رب أفوز والقى اللما
الخلقه ساهل بل مهيل
ما ضاق في وجه الهميل
في الثلث قائم ما عطيل
ويرتل الصلوات يطيل
الوجه نور شوفته بتسر
الفاق نوره علي البدر
قسيم وسيم أسنانه در
دائم السرور رحب الصدر
لو مرة في الشارع يسير
يملأ المكان مسك وعبير
ويبارك الزاد اليسير
والخيرو صابي علي مطير
الجانا بالفرقان بيان
فيهو الشرع واضح عيان
في طريقنا لتلك الجنان
لينا زي نور البيان
من آيه سمن أم سليم
و الضب خاطبه صار كليم
والجزع من فرقو أليم
أرضاه زي طفلا يتيم
البرق لاح من أم صحن
شال المنام عيني صحن
زاد الجراح كبدي إنطحن
وكال الغرام قلبي إنشحن
صليت علي الجده الخليل
نبينا ذو الخلق النبيل
زمزم من كفو تنيل
خمرا وعذبا سلسبيل